Proverbs
Proverbs gathers sayings that shape skillful, godly life—speech, work, family, justice, and the contrast between wisdom and folly. Lady Wisdom calls in the streets; the fool despises instruction.
Aleppo Codex
Proverbs 1
1א משלי שלמה בן-דוד-- מלך ישראל 2ב לדעת חכמה ומוסר להבין אמרי בינה 3ג לקחת מוסר השכל צדק ומשפט ומשרים 4ד לתת לפתאים ערמה לנער דעת ומזמה 5ה ישמע חכם ויוסף לקח ונבון תחבלות יקנה 6ו להבין משל ומליצה דברי חכמים וחידתם 7ז יראת יהוה ראשית דעת חכמה ומוסר אוילים בזו 8ח שמע בני מוסר אביך ואל-תטש תורת אמך 9ט כי לוית חן הם לראשך וענקים לגרגרתך 10י בני-- אם-יפתוך חטאים אל-תבא 11יא אם-יאמרו לכה אתנו נארבה לדם נצפנה לנקי חנם 12יב נבלעם כשאול חיים ותמימים כיורדי בור 13יג כל-הון יקר נמצא נמלא בתינו שלל 14יד גורלך תפיל בתוכנו כיס אחד יהיה לכלנו 15טו בני--אל-תלך בדרך אתם מנע רגלך מנתיבתם 16טז כי רגליהם לרע ירוצו וימהרו לשפך-דם 17יז כי-חנם מזרה הרשת-- בעיני כל-בעל כנף 18יח והם לדמם יארבו יצפנו לנפשתם 19יט כן--ארחות כל-בצע בצע את-נפש בעליו יקח 20כ חכמות בחוץ תרנה ברחבות תתן קולה 21כא בראש המיות תקרא בפתחי שערים בעיר--אמריה תאמר 22כב עד-מתי פתים-- תאהבו-פתי ולצים--לצון חמדו להם וכסילים ישנאו-דעת 23כג תשובו לתוכחתי הנה אביעה לכם רוחי אודיעה דברי אתכם 24כד יען קראתי ותמאנו נטיתי ידי ואין מקשיב 25כה ותפרעו כל-עצתי ותוכחתי לא אביתם 26כו גם-אני באידכם אשחק אלעג בבא פחדכם 27כז בבא כשאוה (כשואה) פחדכם-- ואידכם כסופה יאתה בבא עליכם צרה וצוקה 28כח אז יקראנני ולא אענה ישחרנני ולא ימצאנני 29כט תחת כי-שנאו דעת ויראת יהוה לא בחרו 30ל לא-אבו לעצתי נאצו כל-תוכחתי 31לא ויאכלו מפרי דרכם וממעצתיהם ישבעו 32לב כי משובת פתים תהרגם ושלות כסילים תאבדם 33לג ושמע לי ישכן-בטח ושאנן מפחד רעה
Aleppo Codex. Public domain or openly licensed historic text.