Psalms
The Psalter is Israel’s hymnbook: lament, praise, thanksgiving, royal psalms, and wisdom. It trains the heart to speak to God in trouble and in joy, and it points ahead to the Messiah.
Aleppo Codex
Psalms 96
1א שירו ליהוה שיר חדש שירו ליהוה כל-הארץ 2ב שירו ליהוה ברכו שמו בשרו מיום-ליום ישועתו 3ג ספרו בגוים כבודו בכל-העמים נפלאותיו 4ד כי גדול יהוה ומהלל מאד נורא הוא על-כל-אלהים 5ה כי כל-אלהי העמים אלילים ויהוה שמים עשה 6ו הוד-והדר לפניו עז ותפארת במקדשו 7ז הבו ליהוה משפחות עמים הבו ליהוה כבוד ועז 8ח הבו ליהוה כבוד שמו שאו-מנחה ובאו לחצרותיו 9ט השתחוו ליהוה בהדרת-קדש חילו מפניו כל-הארץ 10י אמרו בגוים יהוה מלך-- אף-תכון תבל בל-תמוט ידין עמים במישרים 11יא ישמחו השמים ותגל הארץ ירעם הים ומלאו 12יב יעלז שדי וכל-אשר-בו אז ירננו כל-עצי-יער 13יג לפני יהוה כי בא-- כי בא לשפט הארץ ישפט-תבל בצדק ועמים באמונתו
Aleppo Codex. Public domain or openly licensed historic text.