Genesis
Genesis opens Scripture with God creating the heavens and the earth, then traces humanity’s fall, the flood, and God’s choice of Abraham. The book follows the patriarchs—Abraham, Isaac, Jacob, and Joseph—as the promise of land, offspring, and blessing takes shape.
Aleppo Codex
Genesis 14
1א ויהי בימי אמרפל מלך שנער אריוך מלך אלסר כדרלעמר מלך עילם ותדעל מלך גוים 2ב עשו מלחמה את ברע מלך סדם ואת ברשע מלך עמרה שנאב מלך אדמה ושמאבר מלך צביים ומלך בלע היא צער 3ג כל אלה חברו אל עמק השדים הוא ים המלח 4ד שתים עשרה שנה עבדו את כדרלעמר ושלש עשרה שנה מרדו 5ה ובארבע עשרה שנה בא כדרלעמר והמלכים אשר אתו ויכו את רפאים בעשתרת קרנים ואת הזוזים בהם ואת האימים בשוה קריתים 6ו ואת החרי בהררם שעיר עד איל פארן אשר על המדבר 7ז וישבו ויבאו אל עין משפט הוא קדש ויכו את כל שדה העמלקי--וגם את האמרי הישב בחצצן תמר 8ח ויצא מלך סדם ומלך עמרה ומלך אדמה ומלך צביים ומלך בלע הוא צער ויערכו אתם מלחמה בעמק השדים 9ט את כדרלעמר מלך עילם ותדעל מלך גוים ואמרפל מלך שנער ואריוך מלך אלסר--ארבעה מלכים את החמשה 10י ועמק השדים בארת בארת חמר וינסו מלך סדם ועמרה ויפלו שמה והנשארים הרה נסו 11יא ויקחו את כל רכש סדם ועמרה ואת כל אכלם--וילכו 12יב ויקחו את לוט ואת רכשו בן אחי אברם וילכו והוא ישב בסדם 13יג ויבא הפליט ויגד לאברם העברי והוא שכן באלני ממרא האמרי אחי אשכל ואחי ענר והם בעלי ברית אברם 14יד וישמע אברם כי נשבה אחיו וירק את חניכיו ילידי ביתו שמנה עשר ושלש מאות וירדף עד דן 15טו ויחלק עליהם לילה הוא ועבדיו ויכם וירדפם עד חובה אשר משמאל לדמשק 16טז וישב את כל הרכש וגם את לוט אחיו ורכשו השיב וגם את הנשים ואת העם 17יז ויצא מלך סדם לקראתו אחרי שובו מהכות את כדרלעמר ואת המלכים אשר אתו--אל עמק שוה הוא עמק המלך 18יח ומלכי צדק מלך שלם הוציא לחם ויין והוא כהן לאל עליון 19יט ויברכהו ויאמר ברוך אברם לאל עליון קנה שמים וארץ 20כ וברוך אל עליון אשר מגן צריך בידך ויתן לו מעשר מכל 21כא ויאמר מלך סדם אל אברם תן לי הנפש והרכש קח לך 22כב ויאמר אברם אל מלך סדם הרמתי ידי אל יהוה אל עליון קנה שמים וארץ 23כג אם מחוט ועד שרוך נעל ואם אקח מכל אשר לך ולא תאמר אני העשרתי את אברם 24כד בלעדי רק אשר אכלו הנערים וחלק האנשים אשר הלכו אתי ענר אשכל וממרא הם יקחו חלקם {ס}
Aleppo Codex. Public domain or openly licensed historic text.